ఫిబ్రవరి 14 అనగానే ప్రపంచవ్యాప్తంగా ప్రేమికులకు, ముఖ్యంగా యువతకు గుర్తొచ్చేది ప్రేమికుల రోజు పండుగే. కానీ 2019 ఫిబ్రవరి 14 న మాత్రం భారతీయులకు ఆ రోజు పీడకలగా గుర్తుండిపోతుంది. కారణం, జమ్ము నుండి శ్రీనగర్ వెళ్ళే జాతీయ రహదారిలో ఒక ఉగ్రవాది, కారుతో ఆత్మాహుతి దాడికి పాల్పడటమే. ఆ ఘోరమైన సంఘటనలో 40 మంది మన భారతీయ సైనికులు మనకు కాకుండా పోయారు. విధి నిర్వహణలో ఉన్న సైనికులు అకస్మాత్తుగా ఆ రాక్షసుడి చర్యకు బలైపోవడం యావత్ భారతావనినీ శోకసంద్రంలో ముంచేయగా, ఎంతో మందికి కోపాన్ని, అవేదనను మిగిల్చింది. ఆ కసి, బాధ ఎంతమంది ఈ ఫిబ్రవరి 14 న గుర్తుచేసుకుంటున్నారు? ఆ బాధని మర్చిపోయి యధావిధిగా ప్రేమికుల రోజు సంబరాల్లో మునిగిపోతున్నారా? అంటే, దాదాపు అవుననే సమాధానం వినిపిస్తోంది. కానీ చనిపోయిన సైనికుల కుటుంబాలు ఎన్నటికీ మరవలేవు అనేది కఠోర వాస్తవం.